Unha Filoloxía para o Século XXI

Chamada de traballos

Neste encontro reflexionarase sobre a filoloxía que se está a facer nos nosos días e tamén sobre o que o que cabe esperar da filoloxía que se faga nas próximas décadas. O debate xirará ao redor de tres grandes cuestións:

1. Narrativas, culturas e sociedades. A linguaxe é unha actividade humana que se materializa en linguas diferentes producidas por comunidades diversas que dotan a humanidade da súa característica pluralidade cultural. A literatura expresa ideas e emocións que, emanando das persoas que a fan, poden contemplarse e estudarse tamén desde a perspectiva da identidade cultural das comunidades en que esas persoas están insertas. Ao igual que a literatura, moitos outros tipos de narrativas son elaboradas e transmitidas con esa finalidade. Que relación dialéctica se está a dar hoxe entre esta diversidade lingüística e cultural e as forzas culturalmente estandarizadoras? Como as narrativas condicionan os modos de ver o mundo e intervir nel?
2. Filoloxía e tecnoloxías da información e a comunicación. No noso inmediato presente e no futuro próximo, que usos debe facer a filoloxía das tecnoloxías da información e a comunicación que están revolucionando o mundo desde o tramo final do século XX? Que uso está xa a se facer deles na actualidade? Esas tecnoloxías de que forma aparecen como recursos que poden salientar aínda máis a necesidade do papel axencial da filoloxía e do seu potencial reflexivo, interpretativo, explicativo?
3. Filoloxía e transdisciplinariedade. A filoloxía do futuro non se pode encerrar no seu exclusivo reduto de saberes e métodos, senón que se ten que abrir á colaboración con outras ciencias humanas, sociais, naturais e formais ou “exactas”. Na realidade, a filoloxía veuse facendo durante séculos coas portas abertas a outras disciplinas humanas ou sociais. Talvez o que cómpre pensar agora é como debe ser a súa relación cos tipos de ciencias ás que menos se ten aberto no pasado: as naturais e as formais.